كذبة جهاز كريزي فت Crazy Fit Massage وكل الاجهزة المعتمدة على الهز

كويتية أمورة · 30-10-2006, 12:25 AM

السلام عليكم ورحمة الله وبركاته

طبعا الكل شاف دعاية جهاز كريزي فت Crazy Fit Massage اللي يحطونها على قناة فنون وبالجرايد ويقولون لكم انه يحرق 300 سعره ب 5 دقائق وسعره 180 دينار!!!

اتمنى ان محد يصدق هالكلام بتاتا لأنه جذب بجذب

انا راح اشرحلكم ليش هالجهاز وكل اجهزة الهز ماتنفع وهالكلام من متخصص مو اي احد

الجهاز هذا ماراح يحرق هالسعرات لسبب بسيط
السعرات عشان تحرقينها لازم الجسم يبذل مجهود مو مني والطريج
الجهاز هذا مو قاعد يخليج تبذلين اي مجهود مجرد انه يهزج وبس

مثلا عندج سيارة متروسة بانزين
تبين تحرقين البانزين لازم تشغلين السيارة وتمشين فيها
اما اذا طفيتي السيارة ووقفتي وراها تدزينها بجذي السيارة تتحرك لكن بدون ماتحرق اي نقطة بانزين

اتمنى يكون شرحي وافي ومفهوم بس عشان لاتنغشون بهالدعايات الكاذبة وتقطون فلوسكم على الفاضي
وصدقوني لو هالجهاز نتيجته حقيقية جان ماشفتوا احد متين بالعالم ودكاترة الريجيم والشفط سكروا عياداتهم وقعدوا ببيوتهم

ولا شرايكم؟؟

فالاحسن ان احنا نلجأ للطرق الصحية والمضمونة لإنقاص الوزن مثل الرياضة والريجيم المتوازن والمشي ومافي مانع من عمل مساجات تساعد على تفتيت الدهون وتوزيعها بالجسم اما اركب على جهاز يهززني واضعف ماعتقد شغله واقعية ولاتدش العقل ولا الموضوع بهالسهوله

مع تمنياتي لكم بأجسام رشيقة وصحية يارب

31-10-2006, 10:36 PM

مشكوووورة عاد انا اغرتني الدعاية

وفكرت اشتريه بس اشوة الله يحبني

02-11-2006, 04:51 PM

يسلمووووووووو اموووره على هالتوضيــــــــح

03-11-2006, 08:56 PM

لافندر زين ماشريتيه اشوه لا والمصيبة سعره 180 وهو بالصين ب 60 دينار يعني 3 اضعاف السعر
تبين شي يضعفج وينسق جسمج اخذي اوربت تراك ولا الدراجة احسن شي
انا مايضحكني الا لا حطوا الرقاصة لووووول

بيور
العفو حبوبة وحياج الله

04-11-2006, 12:15 AM

ودي باوربت تراك بس خايفة اركنه مثل باجي ربعه بس توووووبة اشتري واركن

04-11-2006, 12:18 AM

لا ليش تركنينه حسافه عاد وايد زين
وبعدين يمرن الجسم كله من الاذرع الى الريول ومايسبب عوار بالركبه مثل جهاز المشي

04-11-2006, 08:20 AM

تسلمين اموره عالتنبيه .. اي والله الرقاصه شكلها تحفه! لوووووووووووول

04-11-2006, 10:35 AM

الله يسلمج حبوبة

عاد لاحطوا الرقاصة تعالي شوفي اليهال شلون يقلدونها لوووول طماشة
ولا بوكرشة اللي موقفينه عالجهاز والكرشة تقولين جلي خخخخخخخ

13-02-2007, 06:21 AM

مشكووووووووووره

17-02-2007, 02:46 AM

العفو امون حياج الله

أدوات الموضوع
عرض نسخة صالحة للطباعة أرسل هذا الموضوع إلى صديق
طرق مشاهدة الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 4 ( الأعضاء 0 والزوار 4)

الإهداءات
إضافة إهداء

للمزيد من مواضيعي